30 September 2011

Ativista justisa sei vizita TL husi Arjentina


Telespetadór sira televizaun nian sei iha biban hodi aprende kona-ba susesu kampañia justisa ba krime sira hasoru umanidade nian.

TVTL sei hatudu filme El Cerco (Serku) kona-ba Patricia Isasa ninia kampañia ba justisa iha Arjentina iha Domingo, 09 Outubru, tuku 08:30 kalan. [Ami husi deskulpa tanba TVTL la tuir sira nia promete atu hatudu filme iha loron 1 Outubro.]  Filme ne’e iha dalen Español ho subtítulu iha dalen Inglés no Tetun.

Patricia Isasa nu’udar organizadora  estudante ho tinan 16 iha Santa Fé, Arjentina, bainhira polisia no soldadu sira kaer na’ok nia no tortura, no hatama nia ba prizaun la prosesu durante tinan rua ho balun iha ida hosi sentru sira detensaun no tortura klandestina 585 ne’ebé harii durante tempu ditadura. Depois batalla legál hodi lori ninia torturadór sira ba justisa, ema na’in neen hosi sira ne’ebé tortura nia simu sentensa ho tinan naruk iha prizaun iha tinan 2009. Sira balun nu’udar majór no juís durante dekada tolu entre bainhira sira komete krime no bainhira hetan justisa.

La’o Hamutuk organiza hatudu filme ida ne’e ba preparasaun vizita Patricia Isasa nian mai Timor-Leste iha Outubru, ne’ebé sei inklui ko’alia haleu nasaun ka enkontru ho komunidade no eventu balun iha Dili. Sra. Isasa sei fahe ninia esperiénsia kona-ba ninia susesu luta ba hakotu impuniade iha Arjentina liuhosi lori perpetradór sira krime sériu nian ba julgamentu no preizaun. Ninia esperiénsia sei fó esperansa no motivasaun ba ema Timoran sira ne’ebé kontinua sofre hosi klima impunidade ne’ebé iha daudaun ba krime sira hasoru umanidade ne’ebé komete durante tinan 24 nia laran hosi okupasaun Indonézia iha Timor-Leste.

Hakarak informasaun tan, ka atu organiza hatudu filme ne’e ka hasoru malu ho Sra. Patricia Isasa, favor ida kontaktu Jose Pereira iha La’o Hamutuk: jose@laohamutuk.org ka 3321040 ka 736-7518.

No comments:

Post a Comment